Em wek malpera zerevani.org nîvîsa rojnamenûs û nîvîskar Dilbixwîn Dara ku li roja 02. Hezîran 2009 di malpera www.avestakurd.net da nîvîsî bu belaf diken.

Dilbixwîn Dara: Pêşmergeyên Zêrevanî kî ne? Zêrevanî bi xwe artêşeke çawa ye? Bersiva van pirs û gelek pirsên din di vê nivîsê de hûnê bibînin...

Başûrê Kurdistanê, tevî gelek kêmasiyan jî, pir bi lez tê avakirin û bi pêş dikeve. Ferqa ku me di navbera 2005-2009 de dît gelekî mezin bû. Kurdistan ne Kurdistana berê bû. Kurdistana 2009 gelekî ji ya berê moderntir bû.

Tiştên xeran tune bûn, kêmasî tune bûn? Bê guman hebûn.

Weke nimûne, riyên wê xerab bûn. Dema ku rê çêkiribûn, li însanan nefikirîbûn, cih tunebû ku mirov ji aliyekî cadeyê biçe aliyê din, di dema çêkirina rê de tenê li otomobîlan fikirî bûn.

Me ji berpirsiyaran re behsa vê yekê kir, wan jî ew weke kêmasiyekê didîtin û diyar kirin ku ew li riya çareserkirinê digerin.

Li Kurdistanê, mebesta min başûrê Kurdistanê ye. Dixwazî bi balafirê biçe, dixwazî jî bi riya bejî, te gava xwe avête hundirê Kurdistanê û te pêl axa welat kir, tu yekser, pêşmergeyê Zêrevanî li pêşberî xwe dibînî.

Li ser sînor, li ber her daîreyekê, li kêleka her cihekî hesas, di her kolanekê de, baran be, berf be, tav be, ewr be, tu yan pêşmergeyekî nobedar, yan jî grupeke pêşmergeyan dibînî ku nobedariya cihê ku lê dimîne dike.

Berî ku em biçin serdana General Ezîz Weysî (Fermandarê Giştî yê Pêşmergeyên Zêrevanî), me hinek pêşmerge dîtin û li rewşa wan pirsî.

Piraniya wan ji halê xwe memnûn bûn. Kêfxweş bûn ku di nava hêza Zêrevanî de cih digirtin.

Pêşmergeyê bi navê Aras, ku min ew li kêleka Keleha Hewlêrê dît, ji min re got, ew difikire ku dema pêşmergetiya xwe dirêj bike –eger were qebûlkirin- Ew ji rewandizê hatibû Hewlêrê û li wê derê Pêşmergeyê Zêrevanî bû. Gazinên wî ji miaşê wî hebû. Got, ew hêvî dike ku miaşê wî zêde bibe.

Pêşmergeyên Zêrevanî êdî artêşeke nîzamî ye

Ne bi wateya klasîk, pêşmergeyên Zêrevanî êdî mirov dikare bêje bingeha artêşeke nîzamî ye. Dîsîplîna di nava vê artêşa Kurd ya biçûk de, dîsîplîna artêşeke mezin e. Ew bi şêweyekî modern têne perwerdekirin. Şêweyê perwerdeya wan şêweyê rojavayî ye.

Ew hem di warê eskerî de, hem di warê rewşenbîrî de hem jî di warê civakî de bi awayekî peryodîk têne perwerdekirin.

Em ji xelkê dipirsin, ka nêrîna wan li ser Zêrevanî çi ye? Her kes dibêje, ew gelekî bi terbiye û bi exlaq in. Karê xwe baş dikin. Kesê ku problemên wî derkevin jî, ew li gora destûra hundirîn têne cezakirin.

Di nava Pêşmergeyên Zêrevanî de jin jî hene. Jinên Zêrevan bi piranî di warê îdarî de kar dikin. Gelek ji wan di ragihandinê de wezîfedar in.

Kesê ku derbasî nava pêşmergeyê Zêrevanî bibe, ji bo ku were qebûlkirin, gelek test jêre lazim in, di serî de divê dosya wî pak be, divê kefîlekî wî hebe, divê ji bo fedekarî û parastina Kurdistanê amade be... divê bi kêmanî 3 salan peymanê çêbike... û gelek daxwazên din, eger hate qebûlkirin, ew êdî derbasî nava grupa perwerdeyê dibe û tê perwerdekirin, piştre kincên Pêşmergeyê Zêrevanî li xwe dike û diçê cihê ku ji bo wî/wê hatiye destnîşankirin.

General Ezîz Weysî

Lîwa Ezîz Weysî, fermandarê giştî yê Zêrevanî ye. Ev hêz, bi destê wî hatiye mezinkirin. Kesên ligel wî kar dikin dibêjin, ew şev û roja xwe dide Pêşmergeyên Zêrevanî.

Ew bi hêminî fedekarî û tecrubeya xwe li Kurdistanê naskirî ye. Ew bi xwe ji Duhokê ye, ji gundê Banê ye, kurê şehîdekî navdar e, bavê wî Weysî Banê, li herêma Behdînan cihê rêzgirtinê ye. Weke pêşmergeyekî qehreman tê naskirin.

Serokerkanê Iraqê Babekir Zêbarî, dema ku me hevpeyvîn pêre çêkir, got “Weysî Banî semboleke durustî, fedekarî û qehremaniyê bû, ew şehîdekî mezin e”...

Piştî ku em di ser gelek cihê kontrolê re derbas dibin û gelek caran têne rawestandin, em digihên baregeha Ezîz Weysî, ew bi rûyekî li ken pêşwaziya me dike û me dibe odeya xwe.

Em gelekî suhbet dikin.

Di ber vexwarina çayê re, em hem dipirsin, hem bersiva pirsên ku ji me têne kirin didin.

Piraniya suhbeta me li ser parastina Kurdistanê çêdibe. Ew dibêje, Zêrevanî amade ye Kurdistanê biparêze, ew xwediyê wê fedekariyê ne.

Zêrevanî çi wezîfeyê dibîne?

Em dipirsin Zêrevanî hêzeke çawa ye?

General dibêje, Zêrevanî gelek wezîfeyan bi hev re dibîne, ew hem esker e, hem polîs e, hem jî tîma taybetî ye. Li her cihekî ku pêwîst be, Zêrevanî li wê derê ye. Hinek caran jî dema ku tê xwestin rola polîsê trafîkê jî dibîne, yan jî polîsê parastina jîngehê...

Zêrevanî li gora ku general Ezîz Weysî dibêje, dema ku mêvanên hikûmetê tên, ew bi parastina wan kes yan  jî şandeyan jî radibin.

Bi rastî jî weke ku me dît, Zêrevanî hêza herî xurt bû li Kurdistanê. Em diçûn kuderê em li wan rast dihatin.

Ew dibêje, artêşa ku ew dixwaze hîn nehatiye avakirin. Lê belê wî hêzeke xurt, bi dîsîplîn û pir fedekar ava kiriye.

Pêşmerge divê bingeheke wî ya kulturî hebe, dibêje. General Ezîz Weysî bi xwe girîngiyeke mezin dide perwerdeya rewşenbîrî, “pêşmergeyên Kurd divê di warê rewşenbîrî de perwerdekirî bin, divê zana bin, divê haya wan ji dinyayê hebe...”

32 hezar Pêşmergeyên Zêrevanî

Hêza Pêşmergeyên Zêrevanî 32 hezaran derbas dike. Eger rê vekin, wê hejmar duqat bibe. Lê belê ew niha nafikirin ku hejmarê zêdetir bikin.

General Ezîz Weysî dibêje, gelek keç û xortên Kurd, her demê serî li wan didin û doza wê yekê dikin ku bibin Pêşmergeyên Zêrevanî.

Lîwa Ezîz Weysî, bi xwe hemû hêza xwe kontrol dike, pirsgirêkek hebe, bi xwe pêre mijûl dibe. Hez nake karê xwe bihêle roja din.

Mêvanên Zêrevanî

Dema ku em li wir bûn, Zêrevanî hema hema her roj pêşwaziya şandeyan dikir. Ji gelek welatan, şandeyên eskerî û sivîl dihatin serdana Pêşmergeyên Zêrevanî.

Navbera Zêrevanî û Hêzên Hevpeyman yên li Iraqê gelekî baş e, bi taybetî ligel hêzên Amerîkî.

Her wiha Kurd jî, bi taybetî Kurdên ji beşên din yên diçin serdana Kurdistanê, bi serdana Pêşmergeyên Zêrevanî gelekî kêfxweş dibin. Eger dema wî hebe, Ezîz Weysî bi xwe bi wan mêvanan re mijûl dibe.

Gelek hunermendên Kurd jî, gelek caran diçin li Zêrevanî konseran pêşkêş dikin. Pêwendiya Zêrevanî û gel pir germ e.

Dema ku em li wir bûn, zêdetirî sed xwendekarên zanîngehê hatibûne serdana Zêrevanî. Ji her çar beşên Kurdistanê hatibûn.

Hinek ji wan ji bajarê min jî hebûn. Hatibûn li başûr dixwendin. Bi dîtina Zêrevanî ji nêzîk ve, gelekî kêfxweş bûn. Min ji xwendekarê bi navê Rêdûr pirs kir, te çawa dît?

Got, “weke xeyalekê ye, gelekî serbilind im ku em Kurd xwediyê hêzeke wiha ne...”

Başûrê Kurdistanê - Hewlêr

http://avestakurd.net/news_detail.php?id=5181