Me wek malpera zêrevanî hevdîtinek çêkir bi Fermandê Fermandeya Pêşmêrgeyên Zêrevanî ya Kurdistanê general Azîz Weysî re li jorê xwe li baregeha Pêşmergê Zêrevanî li Hewlêr. General Weysî, derheqa têkiliyên hêzên Pêşmergeyan bi hikumeta Bexda re û li ser têkoşîna li dijî tîrorê axivî.

General Azîz Weysî got ku hemu xebatên li ser rêveberiya Bexdayê, di çarçoveya destura bingehîn ya Iraqa Fîderal da têne meşandin. General Weysî tewrê hikumeta Iraqê rexne kir  ku ew hêşta jî naxaze hêzên Peşmergeyan weku parçeyekî ji Arteşa Iraqê bibîne.   Weysî wusa axivî: "Çi bo artêşa Iraqê tê, divê bo Peşmergên Kurdistanê jî were. Ji aborîya artêşê heta hemu cure çekan, divê Pêşmergên Kurdistanê jî para xwe ya bi adalet bigrin. Belê, însanên me bi manewiyateka bilind kar dikin, ne ji bo diravê wê, bes bo şerefa wê bûne Peşmerge. Dîsa jî, divê hikumeta Iraqê bi adalet bi. Me bi gelek îmkanên biçûk, li dijî tîrorê şer kir û em serkeftî ne jî. Me li ser tecrubeyên xwe Kurdistan kir cihekî emnî û bi îstîqrar. Û em dê berdewam bin di vî karê pîroz da."

Em ew hevpeyvîna bi general Azîz Weysî re li jêr pêşkêşî xwendevanên xwe dikin:

Zêrevanî : Birêz Kek Azîz Weysî, , we wek  Fermandê Pêşmergên Zêrevanî ya Kurdistan ê hindek gav avêtibû ji bo ku hêzên Pêşmergê Kurdistanê bikeve ser Wezaretî Bergirî yê Iraq. Ew rewş evro çi merhalê da ye?

General Azîz Weysî : Hevdîtin û xebatên me berdewam in ligel Wezareta Bergirî ya Iraqê. Bes heta niha hêşta negêhîştine netîceyekî. Hemî tişt di çarçoveya destura bingehîn de têne meşandin. Gelek tişt hatin kirin û baweriya min ew e ku em gelek nêzîk de bighêjin netîceyekî.

Zêrevanî : We biryar hebû tevlî Plana Ewlekirina Bexda bibin, û hêzên Kurda têvlê vê planê bûn. Gelo heta niha tu guhertin hatine çêkirin yan na? Ev beşdarbûna we çi tesîr kir li ser rewşa emnî ya Bexda?

General Azîz Weysî : Ez vegerim ser pirsa we ya ewil. Serokê Hikumeta Herêma Kurdistanê ku niha li Bexda ye, ji bo heman armancê çûne da ku bighêjin îttîfaqekî di navbera xwe û hikumeta Bexda. Û ez bawer im ew arîşe bête çareser kirin.

Bo mesela Pêşmergên Kurdistanê ku li Bexda ne: Tu Pêşmerge li ser navê Herêma Kurdistanê neçû Bexdayê, ê ku çûne Bexdayê leşkirê Iraqê ne. Ew hêzên ku niha li Kurdistanê peywirên xwe pêktînin, ji bo wan jî hemu Iraq vekirî ye ku her navçeyek ku pêwîstî pê hebî biçin karê xwe yê leşkirî  bikin bo emnîyeta Iraqê. Ew qewetê ku ji wê re çûne hemî zanibûn ku ne li ser me ne, û ji cemawerekî gelek baş hatibû hilbijartin ku ew dur bîn ji şerê bîr û bawerî, dur bûn li şerê neteweperestî, dur bun li şerê qewmeperestî û dînperestiyê. Ewana çûbûn wêderê ku qanun berqirar bibe li Bexda. Ew telîmatên ku ji bo wan hatine, bi taybetî ji Wezareta Bergiriya Iraqê, ji Lijna Emnî ya Bexda, di derheqa cîbicîkirina plana emnî ya Bexda ne. Niha jî hemû gehîştine wê armancê, gehîştine wê noqta bilind ya aksê berê. Yên ku berê digotin çênabe ew qewet were, em li dijî wê qewetê ne, niha jî dibêjin hêj ew qewet zêde bibin, berdewam bibin, -daxwazên bi vî awayî gelek zêde ne. Belê, ew li wê derê belku bi navê pêşmerge kar dikin û ew jî bo me şerefek e. Bes qewetên ku çûne wêderê, wezîfê wan pêşmergayetî nebû; wezîfê wan karê leşkerî yê Iraqê bû. Çûne wêderê, karê xwe kirine û serkeftî bûne. Ji ber ku ew exlaq, ew manewiyata pêşmergê di wan da bû. Ruhê pêşmergayetî hêlaye ku di wê berz û bilindahiyê da karê xwe bikin.

Zêrevanî : Gelo tu cebirxane ji leşkirê Iraqê bo Pêşmergên Kurdistanê hatiye?

Azîz Weysî : Heta vê gavê nehatiye. Ji ber ku îtîfaq nehatiye kirin li ser ew beşên ku li ser Kurdistanê bimînin. Ew hevdîtinên ku têne kirin ez bawer im dê bighên encamekî. Madem ku Pêşmerge beşek e ji leşkirê Iraqê, pêwîst e hemû techîzatên leşkirî li gorî wê bêne parvekirin. Eger sed kalaşnîkov bên bo artêşa Iraqê, divê 17 kalaşnîkov bo Pêşmergê bin. Eger sed helîkopter bên bo artêşa Iraqê, divê 17 helîkopter bo Pêşmergê bin. Divê ev werin qebul kirin, ew mafê leşkirê Kurdistanê ne.

Zêrevanî : Gelo tu pirsgirêk di navbera we û Wezareta Navxo yan Wezareta Bergirî ya Iraqê de çêbûye?

General Azîz Weysî : Ew bi xwe pirsgirêkek e ku tu peywendiyên me ligel wan nînin. Hîç îtiraf nehatiye kirin ku Pêşmergên Kurdistanê parçeyek e ji leşkirê Iraqê. Ew bi serê xwe pirsgirêkek e. Pêşmerge evro bes bi bîr û bawerîya xwe, bi îradeya xwe, bi manewîyata xwe ya bilind karê xwe yê ewlekariyê pêktîne. Û di şertên gelek zehmet û dijwar û di nav gelek bê îmkaniyet da. Di çarçoveya Iraqê de îmkanyet û jiyana Pêşmergên me ya herî nexweştir e, kesê ku dahatê wî ji hemuya kêmtir e di Kurdistanê de, û kesê ku ji hemuya zêdetir zehmet dibîne, Pêşmerge ye. Û ji bilî vê, ew bi xwe herdem hedefa dijminan e. Wekî min gotibû, Pêşmergên Kurdistanê bi bawer e ku bergiriya axa welatê xwe dike, ew nehatiye ku bi Pêşmergayetî dewlemend be. Ew hatiye ku bi şereftirîn û serbilindtirîn mirovê netewa xwe be.

Zêrevanî : Eger dijminekî êrîş bîne ser Kurdistanê, hûn bawer in bi serkeftina hêza Pêşmerge?

General Azîz Weysî : Pêşmerge îrada wê gelek biqewet e. Bawerîya wî xurt e. Evro ji her wextî zêdetir bi armanca xwe ve girêdayî ye. Gehîştiye wê qenaatê ku, her çi êrîş were ser heqê jiyana Kurdan, ser Kurdistanê; bo serkeftinê çi qurban pêwîst be Pêşmerge amade ye bide. Baweriya Pêşmergê, di aliyê zanistî de jî gelek pêşketî ye, ne wekî berê ye. Têgihîştina wî gelek bilind e, û li gorî wê fidakariya wî jî. Ez dibêjim, kesê ku destê xwe dirêj ke bo Kurdistanê, Pêşmerge dê wî destî poşman dike.

Zêrevanî : Rolê Pêşmergê Zêrevanî bi taybet bo şerkirina li dijî tîrorê da çi ye?

General Azîz Weysî : Em parçek in ji Pêşmerge û ji qewetên emnîyeta sînoran. Di herdu aliyan de jî em kar dikin. Rolê Pêşmergên Zêrevanî di vir de gelek diyar e. Gel ewî teqdîr dike ka dewr û rolê Zêrevanî di warê emniyetê da çi ye û çi nîne. Herçend ku Hikumeta Iraqê beşa aborî ya desturî bo Pêşmergên Kurdistanê heta evro neşandibe jî, bi bêîmkaniyetên xwe me heta evro di asta herî bilind da serketine li dijî tîrorê. Herçend dijminê Kurda û grupên tîrorê Kurdistanê ji xwe re bikin hedef jî, dost û dijminê me jî mecbur in vê îtîraf bikin ku Kurdistan evro cihekî emîn e di saya Pêşmergên Kurdistanê de.